“Шундыкар — 2022” удмурт пиналъёслы улоскуспо смена усьтӥськиз. Смена «Ёлочка» лагерьын 10 нунал ӵоже азьланьтӥськоз.

“Шунды” удмурт егитъёслэн мерлыко огазеяськонзылэн председателезлэн но сменалэн кивалтӥсезлэн Виолетта Анисимовалэн верамезъя: «Арысь-аре лагере дышетскыны дасесь нылпиос вуо. Таяз аре ми соослэсь куд-ог ужан ӧрзэс тыршим воштыны. Кылсярысь, выль мунё, эктон ӧръёс усьтӥм. Дышетскон сяна, пиналъёсты вожатойёсын дасям трос тунсыко ужрадъёс возьмало. Котькуд ар выль ымныръёс вуо но пыриськон заявкаос трос но трос луо! Озьыен асьме лагерьмы кулэ но ми юнме та быдӟа уж ум быдэстӥське».

Ваньзэ лыдъяса та арын ог 150 заявка келямын вал. 88-сэз соос пӧлысь лагере вуизы. Тросэз ог-огзэс тодо ни, малы ке шуоно «Шундыкар» лагере огпол гинэ вуылэмын ӧвӧл.

«Котькуд адями та лагере сюрыны уз быгаты. Мон туж шумпотӥсько мыным сыӵе дан усиз шуыса. Оскисько, татчы туж усто пиналъёс вуизы шуыса но ми ваньмы эшъяськом» – лагере пыриськись Королёва Аделина вера.

Та аре «Шундыкар»-лы 30 ар тырме! Ужам аръёс куспын лагерь одӥг гинэ мыло-кыдо удмурт удысчиосын выжы ӧз будэты. Соос пӧлын Т. В. Ишматова «Удмурт Кенеш» огазеяськонлэн тӧроез, Н. Уткина Удмурт Элькунысь калык артист, О. Степанова, Ю. Шахтина ӵектосъя удысчиос, В. Ваулина журналист но трос мукетъёсыз.