18-27-тӥ гудырикошконэ «Ёлочка» нылпи лагерьын быгатӥсь удмурт нылпиос понна «Шундыкар» лагерь ужаз. Удмурт егитъёслэн «Шунды» мерлыко огазеяськонзылы ӵектоссэс быдэстыны юрттӥзы Удмурт Элькунысь йӧскалык политикая, Физкультурая, спортъя но егитъёсын ужан политикая министерствоос, Калыкъёслэн эшъяськон юртсы. Туэ со 24-тӥ радъяськиз. Шутэтсконлэн валтӥсь темаез – дыр.

Элькунысьтымы сяна, татчы Башкортостанысь, Татарстанысь, Марий Элысь, Пермь улосысь нылъёс но пиос вуизы. Пиналъёс 11 ӧръя быгатонлыкъёссэс муромытӥзы: суредан, видеоискусство, литература, театр, крезьгуро инструментъёс лэсьтон, фольклор, эстрада, тележурналистика, дӥськут дизайн, эктон, крезьгуран.

Котькуд ортядэн сюлэмзэс поныса тыршизы ӧнерчиос. Ужзылэсь эмышсэ возьматӥзы йылпумъян концертын. «Фольклор» отряд сӥзьыл юмшан йылолэн тодматӥз. Театралъёс П.Захаровлэн пьесаезъя сюлме пырымон спекталь пуктӥзы. Журналистъёс тодмо телепрограммаосты адӟем карыса «Туно-пелёос» но «Эскерино. Чуртнанино» программаос кылдытӥзы, озьы ик архивысь видеосуредъёсты кутыса пиналъёсты «Шундыкарлэн» историеныз тодматӥзы. «Видеоискусство» отрядысь нылъёс но пиос асьсэды сценаристлэн, операторлэн, режиссёрлэн но монтажёрлэн ужаз эскеризы. Богдан Анфиногеновлэн кырӟанэзъя замос клип дасязы. Кырӟасьёс ваньзэс паймытӥзы удмурт мюзиклэн. «Крезь лэсьтон» отрядысь пиос та нуналъёс куспын бадӟым крезь но кубыз лэсьтыны вуттӥллям. Дизайнеръёс «Вукарнан» этно-коллекция возьматӥзы. Нылъёс сцена вылын асьсэды возьыны но возьматыны, шонер буяськыны дышетскизы. Литераторъёс видеокылбуръёсын шумпоттӥзы. Хореографъёс пӧртэм интыосын улӥсь удмуртъёслэн эктонъёсынызы тодматӥзы.

Пиналъёсын нуналысь нуналэ ужазы, шудӥзы, шулдыръяськизы, кузьмазы соослы вунонтэм тодэ ваёнъёс вожатойёс. Сменалэн валтӥсь темаез «дыр» вал бере, нылъёс но пиос историлэн пӧртэм вакытъёсаз вуылӥзы. Кылсярысь, 19-тӥ даурысь балын быръемын вал тужгес но устолыко но быгатӥсь нылаш, нош Совето Союзлы сӥзем нуналэ пиналъёс Съездэ пыриськизы, колхозлы председатель бырйизы. Ужрадъёсы пыриськем понназы нылъёс но пиос бонусъёс басьязы – часъёс. Тужгес но трос «часъёс» люканы быгатӥзы «Суредасьёс».

Туэ «Шундыкар» йылпумъяськиз. Оскиськомы, котькуд пиналлы со юрттоз улонысь аслэсьтыз сюрессэ шедьтыны.