Удмурт Библилы сӥзем празднике Кузонысь Духовной Семинариысь Роман (Модин) проректорлэн, иеромонахлэн ӧтемезъя, 8-тӥ куартолэзе Удмурт шаерысь делегация Татарстан Элькунлэн шоркараз вуылӥз. Делегатъёс пӧлы пыризы: М.Г. Атаманов – протодиакон, удмурт Библилэн авторез, Алнаш ёросысь Юмъя черкогуртысь отец Виталий; тодосчиос – доцент, УдГУ-ысь журналистикая кафедралэн кивалтӥсез А.Г. Шкляев, педагогика наукаосъя кандидат А.В. Ишмуратов, кылосбур наукаосъя кандидат И.В. Пчеловодова, «Удмурт Кенеш» ассоциацилэн ёзчиез Е.К. Александрова но Ижкарысь Свято-Троицкой черкысь кырӟасьёс.

Кузонэ вуэм куноосты шуныт пумитазы. Татчы вуыса, Иоанн Кронштадский семинарилэн черказ Божественной Литургие пыриськимы, со сяна отрчытӥськиз удмурт кылын куриськон, семинариез но трапезаез учкон. Нош валтӥсез вал – удмурт кылын Библиез возьматон.

Ужрадэз ортчытэмзы но радъямзы понна тау шуэммы потэ Роман проректорлы, Леонид протоиерейлы, озьы ик Татарстан Элькунысь удмуртъёслэн мерлыко огазеяськонзылэн кивалтӥсезлы В.С. Романовлы но Нырья черкогуртысь «Сактон» ансамбльлы.

Е.К. Александрова, «Удмурт Кенеш» ассоциацилэн исполкомезлэн ёзчиез