Армениысь, Гамбиысь, Египетысь, Зимбабвеысь, Иорданиысь, Китайысь, Сенегалысь, Сириысь, туркменистанысь, Узбекистанысь егитъёс М.Т. Калашникова нимо Техникая Ижкарысь кун университетын дышетско.

Нырысь ик куноос тодматскизы «Татар доньясы» – «Татарский мир» суредъёсъя но фотоосъя элькун вожвылъяськонэ вуэм ужъёсын. Алия Нагимовна Абдуллина, «Удмурт Элькунысь бигер нылкышноослэн «Ак калфак» кенешсылэн» кивалтӥсез, ортчем вожвылъяськон сярысь вераз, студентъёслэн кылдэм юанъёслы валэктонъёс сётъяз.

Андрей Николаевич Прокопьев, Калыккуспо но финн-угор валчеужанъя ёзэтлэн кивалтӥсез, Калыкъёслэн Эшъяськон юртэнызы тодматӥз. Собере студентъёс куно луизы Мерлыко юрттэт сётонъя но лулчеберетэз азинтонъя «Азия плюс» узбек центрын.

Бӧрысь соос пумиськизы Степан Михайлович Хабаен, «Украин лулчеберетъя «Громада» огазеяськонлэн» ёзчиеныз, но Удмурт Элькунысь егитъёслэн мерлыко огазеяськонъёссылэн ассоциацизылэн кивалтӥсеныз Мария Алексеевна Цареваен. Мария Алексеевна ассоциацилэн ужез сярысь. Пусйиз огазеяськонлэн ёзчиез котькуд мылкыд карись луыны быгатэ шуыса, валтӥсез курон – эшлыко луон.

А.В Рябчиковлы, М.Т. Калашникова нимо Техникая Ижкарысь кун университетысь Калык кусыпъёсъя но валчеужанъя кивалтоннилэн кивалтӥсезлы таӵе пумиськон-тодматскон яраз. Солэн кылъёсызъя, кунсьӧрысь студентъёсыз элькунэнымы, татын улӥсь калыкъёсын но соослэн лулчеберетэнызы тодматон туж кулэлыко луо. Угось куд-огез нырысьсэ дорысьтыз сыӵе кыдёке кошкемын. Асьсэ пушказы медаз выйе шуыса соосты таӵе ужрадъёсы поттано.

Ужрадлэн пумаз Татьяна Петровна Федорова, Калыкъёслэн Эшъяськон юртсылэн воштӥсез, куноослы Эшъяськон юрт сярысь буклетъёс кузьмаз. Егитъёсты оскытӥз – Калыкъёслэн Эшъяськон юртазы котькуд адямиез валалозы но юрттэт сётозы.