Удмурт Элькунлэн Тӧроез Александр Бречалов Антитеррористической комиссилэсь кенешонзэ ортчытӥз, отын калыкъёс но вӧсьбуръёс (религиос) вискысь кусыпъёсты эскеризы. Кенешонэ пыриськизы катэз чаклась ёзэтъёслэн кивалтӥсьёссы, йӧскалык-лучеберетъя но вӧсьбур огазеяськонъёслэн огмуртъёссы.

Йӧскалык политикая министр Эдуард Петров пӧртэм ведомствоослэн ог-огенызы герӟетъёссы сярысь мадиз. Со пусйиз, Удмуртиын экстремизмлэсь утиськонэн тодматон ласянь бадӟым уж нуиське шуыса. Таин валче кылдэм кышкытлыкъёс но рискъёс сярысь но вератэк уг луы. Кылсярысь, мерлыко вотэсын йӧскалык элькунъёсмылы пумит сепаратизм пуштросо уж нуиське, озьы ик Удмуртилы пумит но, сыӵе политикаез куд-ог калыккуспо финн-угор мерлык огазеяськонъёс радъяны туртто. Котькуд нунал вотэсысь бамъёсты эскерон уж нуиське, шедьтэм ивортодэт катчаклась ёзэтъёсы ыстӥське.

Удмуртиын кунсьӧрысь калыкъёс понна 12 йӧскалык-лулчеберетъя мерлык огазеяськонъёс ужало. Азербайджан, армян, узбек, таджик диаспораос тужгес но бадӟымъёсыз пӧлы пыро. Огазеяськонъёслэн кивалтӥсьёсынызы пумиськонъёс ортчыло, отын трос лэчыт ужпумъёс эскерисько, кудъёсыз калыкъёс но вӧсьбуръёс кусыпъёсын, экстремизмлы пумит нюръяськонэн герӟаськемын. Йӧскалык-лулчеберетъя мерлык огазеяськонъёслэн азьветлӥсьёссы асьсэ егитъёссы понна нимысьтыз валэктон уж нуо.

Муниципал кылдытэтъёсысь ӧнерчиослы дышетскон ужрадъёс чакламын. Удысэто вачекусыпъяськонъёс чотын УЭ Прокуратораысь но МВД-ысь ужасьёс дышетскон семинар ортчытъяло муниципал кылдытэтъёсысь кивалтӥсьёслэн воштӥсьёссылы, отын муниципал улосвылъёсын этносъёс но религиос вискысь шуг-секыт югдуръёсты чаклало.

«Миннацлэн нуналъёсыз» ужрадъёс ортчыку, Балезино, Ува, Дэбес, Вавож, Якшур-Бӧдья ёросысь но Глазарысь школаосын экстремизмлэсь но терроризмлэсь утиськонъя валэктонъёс ортчизы, отчы дышетӥсьёс но анай-атайёс пыриськизы. Таӵе практика таяз аре но азинтӥськоз. Озьы ик муниципал ӧнерчиослы тодослыко огазеяськонъёсысь огмуртъёс но вӧсьбур кивалтӥсьёс ортчытӥзы семинар, отын но религиос вискысь экстремизмлэсь но ксенофобилэсь утиськон ужпум ӝутӥськиз.

Эдуард Петров пуйсиз, мерлыко кусыпъёсты миграция но лэчытомытэ шуыса. Элькунамы пуктӥськись юртъёсын но мукет экономика удысъёсын трос мигрантъёс ужало, вылӥ дышетсконниосын 1400-лэсь трос кунсьӧр студентъёс дышетско, кудъёсызлы мерлык но лулчеберет удысъёсын адаптацилы юрттэт кулэ, татын но валтӥсь ужпум – со экстремизм идеологиен нюръяськон. Соин сэрен, ӟеч кусып возиське Миграци ужъёсъя кивалтонниосысь ужасьёс но вылӥ дышетсконниосысь огмуртъёс вискын, кудъёсаз кунсьӧрысь студентъёс дышетско. Миграци катрадлыкын кылдэм воштӥськонъёс сярысь ивортодэт дырыз дыръя вуттӥське. Калыкъёслэн Эшъяськон юртазы школаын дышетскисьёслы, классъёсты нуись дышетӥсьёслы, мерлыко педагогъёслы «Россия многонациональная» ужрадъёс ортчытъясько. Ужрадлэн азьмугез – нылпи-мигрантъёслэсь но соос котырысь муртъёслэсь мерлыко но пушдунне югдурзэс эскерон, расовой но йӧскалык пӧртэмлыкъёс сэрен кылдӥсь зӥбонлэсь чакласькон, ксенофобилэсь, экстремизмлэсь но терроризмлэсь утиськон.

Егитъёсын ужанлы но бадӟым саклык висъяське. Со пӧртэм форумъёсы, стратеги сессиосы, акциосы пыриськон. Кылсярысь, Калыкъёслэн Эшъяськон юртазы этноковоркинг площадка ужаны кутскиз, этноволонтёръёсын ӵектос улонэ вӧлме, этнодырпус кылдытэмын. Озьы ик Калыкъёслэн Эшъяськон юртазы выль инты ужалоз, кудаз шуг-секыт югдуръёсы сюрылэм муртъёс но пыриськыны быгатозы.

Экстремизлэсь утиськонъя асьсэлэн ужамзы сярысь веразы УЭ-ысь Кунпуш министрлэн вриоез Александр Боев но егитъёсын ужан политикая Агенствоысь кивалтӥсь Алексей Выстребов.

Александр Бречалов пусйиз, этносъёс вискысь лэчыт югдуръёсты алонъя сӧзнэто ужез вань удысэтъёсын, тӧрлык ёзэтъёсын, мерлык огазеяськонъёсын ялан нуыны кулэ шуыса. Таин сэрен грант ӵектосъёсты валче быдэсъян уже тросгес удысъёсты кысконо.

«Асьме егитъёсмы кылем арын 40 бадӟым ӵектосъёсъя грантъёс утӥзы – «Движение Первых» огазеяськонлэсь. Соос пӧлысь ӧжытсэ кыкез юн герӟаськемын йӧскалык кусыпъёсын. Асьмеос ваньмы тодӥськомы, валче лэсьтэм ужрадъёс огазеяло. Али грантлы выль заявкаос кутӥсько, дэмласько отчы одно ик пыриськыны», – вераз Александр Бречалов.

Тодэ вайытом, В.Г. Стариков вице-адмирал нимо «НОРД» нылпиослы зарезь центр утӥз грант «Народное единство» этнокультура ужрадлы. Нош «АРТЭ» («ВМЕСТЕ») этнокультуралы дышетонъя но мерлык кичӧлтонъёсъя центр «Родина – значит вместе!» патриотизм мылкыдо ӵектослы грант вормиз. Со луэ Россиысь калыкъёслэн историяя но лулчеберетъя шудонъёссылэсь сузьет, этносъёслэсь кусыпъёссэс юнматон, чакламын Удмуртиысь 12-18 аресъем нылпиослы.