2-тӥ оштолэзе радъяськиз арлы быдэ ортчись «Бадӟым удмурт диктант» акция. Туэ ужрад Дышетсконлэн арезлы сӥземын. Диктантлы текст «Кенеш» журналлэн валтӥсь редакторез, егит удмурт кылбурчи Анастасия Шумилова гожтӥз.

Радъясьёслэн лыдъямзыя, туэ акцие 1000-лэсь ятыр адями пыриськиз. Диктант гожтыны Удмуртиын 100-лэсь трос прощадкаос ужазы. Элькунмылэн палэназ улӥсь удмуртъёс но палэнэ öз кыле: Башкортостанын, Татарстанын, Марий Элын, Пермь улосын но Мускоын площадкаос ужазы. Со сяна, диктантэз радиоын но телевидениын лыдӟизы. Телестудиын асьсэлэсь тодон-валанзэс эскеризы Удмурт Элькунысь дано артистка Светлана Зубкова но «Айкай» театрлэн кивалтӥсез Петр Данилов. Нош радиоын – Удмурт йöскалык театрысь артистъёс Вадим Дмитриев но Марина Самсонова, но Удмурт Элькунысь йöскалык политикая министр Эдуард Петров. «Бадӟым удмурт диктант луонлык сётэ удмурт кылъя тодон-валанъёсты эскерыны. Озьы ик со огазея асьмемыз. Пусъёно, удмурт диктант – одӥг гинэ диктант, кудзэ гожтыны луэ нимысьтыз ужась площадкаосын но теле но радио эфиръёс пыр», – пусйиз йöскалык политикая министр.

Тодады вайытомы, ужъёсты 10-тӥ оштолэзёзь келяно таӵе адресъя: Удмурт Элькун, Ижкар к., Песочной ур., 9. Конвертэ вылэ одно ик «Бадӟым удмурт диктант» шуыса пусъёно. Озьы ик келяны луэ diktant2022@yandex.ru электрон почтае.

Диктантлы йылпумъянъёс лэсьтэмын луозы 30-тӥ оштолэзе.