Ижкарысь Калыкъёслэн эшъяськон юртазы егитъёслэн “Шунды” огазеяськонзылэн йылпумъян-быръён конференцизы ортчиз. Егитъёс кивалтӥсе Вадим Крестьяниновез юнматӥзы.

Конференцилэн ужаз элькунысь но мукет улосъёсысь егит азьмынӥсьёс пыриськизы. Ӧтем куноос пӧлын – Удмуртиысь йӧскалык политикая министр Лариса Буранова но “Удмурт Кенеш” огазеяськонлэн Тӧроез Татьяна Ишматова.

“Шунды” огазеяськонлэн тӧроез Алина Чернова 2018-2020 аръёс ӵоже ужамзылы йылпумъянъёс лэсьтӥз. Люкаськемъёс озьы ик огазеяськонлы матысь кык арлы валтӥсь ужанрадлыксэ кутӥзы. Выль тӧро но бырйизы. Алина Черноваез воштӥз удмурт ӝӧквыл шудонъёсты лэсьтӥсь, “Шунды”-лэн ёзчиез Вадим Крестьянинов. Тодады вайытом, Алина Чернова огазеяськонлэн правлениеныз берло 4 аръёсы кивалтӥз.

туспуктӥз – Марина Степанова

Ивор дасямын Эшъяськон юртысь корреспондентёсын