10-тӥ тулыспалэ Удмуртилэн шоркараз – Ижкарын – дасэтӥез «Пельняньлэн калыккуспо нуналэз» (0+)  этногастрономической фестиваль ортчоз, валтӥсь площадкаез Ижкарысь Шор площадь луоз.

Пельменфестлэн огез ужрадэз – «Удмурт квиддич» яке Ӵужонболъя (18+) пельнянь чемпионат, кудаз 15 команда пыриськоз.

Ӵужонбол – командаен шудон, тупен хоккей, кудаз клюшка интые кызьпулэсь ӵужон кутӥське. Ӵужонболын 6 адямиен быдэн кык команда шудэ, туп но ӵужонэз уже кутыса. Вормисьёс Пельменьфестлэн партнёръёсызлэсь кузьымъёс басьтозы. Та шудон Ымусьтон шулдыръяськон вакытэ кылдӥз, соку удмуртъёслэн пӧртмаськон сям-йылолзы вал. Соин ик Ӵужонболъя чемпионатын шудӥсьёслэн спортивной дӥсьсы – пӧртмаськон дӥськут луоз.

«Удмурт квиддич» шудонлы 6-тӥ тулыспалозь регистраци ортчоно таӵе ссылка пыр: https://pelmenfest.ru/pelmennyj-chempionat-po-uzhonbolu/.

Ӵужонбол Толалтэ шудонъёслэн нуналзы улсын ортчоз «Олимпийский совет Удмуртской Республики» улосвыл мерлык огазеяськонлэн юрттэменыз. Толалтэ шудонъёслэн нуналзы – «Олимпийская страна» программая Россиякуспо физкультура ужрад, 2015-тӥ арысен ортчытӥське Россиысь Олимпи комитетлэн кичӧлтэменыз. Со дасэтӥезлы Сочиын ортчем XXII толалтэ Олимпи шудонъёслы но XI толалтэ Паралимпи шудонъёслы сӥземын.

Дасэтӥез «Пельняньлэн калыккуспо нуналэз» этногастрономической юбилей фестиваль 5–10-тӥ тулыспалэ 2024-тӥ аре Удмурт шаерын радъяськоз. Пельменьфест семьяосты, огазеяськонъёсты, туркымъёсты, эшъёсты герӟалоз ас шуныт пумиськонъёсыныз, мастер-классъёсын, вожвылъяськонъёсын но трос ӟеч ужъёсын.

Пельнянь арнялэн аспӧртэмлыкъёсыз пӧлы пыро егитъёс понна дасям этнокультура интеллектуал ужрадъёс: КВН пельнянь кубок, «Родина – значит вместе» шудон, «Шудком» удмурт кылын визьбуро ӵошатскон, нош огшорыосыз дышем ужрадъёс пӧлын – карысь кафеосын но ресторанъёсын «пельменное меню» акция ортчытон но кулинар огазеяськон, кудӥз мастер-классъёслэсь, веръян-шӧмъянъёслэсь но нимысьтыз акциослэсь кылдытэмын луоз. Фестивальын нырысетӥ ползэ «Кибашлы усточиос» («Искусные умельцы») вожвылъяськон радъямын луоз. Нуналлэн пумаз фестивальлэн нимлыко партнёрез радъялоз «арлы дасям пельнянь» нимо шудон.

Таӵе ужрадъёс элькунлэсь туризмъя синмаськымон луэмзэ будэто, соос быдэсак тупало «Туризм и индустрия гостеприимства» йӧскалык ӵектослэн азьмугъёсызлы, кудзэ Россия Федерацилэн Президентэз Владимир Путин кичӧлтӥз.

Пыр-почгес программаен тодматскыны луоз на Пельменьфест вотэс бамын но ВКонтакте группаын.