«Удмурт нылкышно кенеш» огазеяськон «Удмурт Кенеш» ассоциацилэн бурд улаз кылдӥз удмурт нылкышнолэсь данзэ ӝутон вылысь. 27-тӥ тулыспалэ 1993-тӥ арын удмурт нылкышноослэн элькун конференцизы ортчиз. Отчы 400 делегат пыриськиз. Ужрадын ик огазеяськонлэн правлениез но быръемын вал. Удмурт нылкышно кенешез кылдытонэ трос кужымзэ понэ «Удмурт Кенеш» ассоциацилэн кыл кутӥсь секретарез Нина Малых. Со ик луэ огазеяськонлэн нырысетӥ кивалтӥсез но. Бӧрысь Нина Игнатьевнаез воштӥзы этнограф, история наукаосъя кандидат Людмила Христолюбова, журналист Татьяна Корнилова, история наукаосъя доктор, профессор Галина Никитина, «Удмурт Кенешлэн» Пичи Пурга ёросысь ёзэтэзлэн кивалтӥсез Надежда Степанова. 2020-тӥ арын огазеяськонэн кивалтыны оскизы «Удмурт дунне» газетлэн валтӥсь редакторезлы Елена Миннигараевалы.
Туннэ нуналлы «Удмурт нылкышно кенешлэн» ёзчиосыз элькунысьтымы ваньмаз ик каръёсын но ёросъёсын тыршо. 30 ар ӵоже ини удмурт нылкышноос семьяосын но нылпиосын ужало, анай кылэз но удмурт культураез утёнлы сӥзем трос ӵектосъёссэс улонэ пыӵато.
Сюлмысь ӟечкыласьком! Сӥзиськом азьланяз но нылкышноослэсь данзэс будэтон, нылпиослы удмурт кылзэс яратон мылкыд пыӵатон бордын озьы ик зол ужаны! Выль ужъёс но уно вормонъёс!