30-тӥ пӧсьтолэзьысен элькунамы бадӟым ужрадъёсты ортчытыны лэземын. Вераськон мынэ физкультурая, спортъя но егитъёс понна ужрадъёс сярысь. Кронавирусэн сэрен пуктэм вань сюбегатонъёс палэнтэмын ӧвӧл на. Соин ик Удмуртилэн кунлык басьтэмезлы 100 ар тырмонзэ пусъён улсын радъяно ужрадъёсты кык амалэн дасяло: онлайн но офлайн.

Котырес дырпус паськыт пусйиськоз 3-4-тӥ шуркынмонэ. Валтӥсь ужрадлэн концепциез дасямын эпидемиологи югдурез лыдэ басьтыса, соин ик со ортчытэмын луыны быгатэ учкисьёсын но, учкисьёстэк но.

100 ар пусъёнын бадӟым инты басьтыны кулэ вал Гербер шулдыръяськон. Калыклэн яратоно праздникез 20-тӥ инвожое Вавож ёросын ортчыны кулэ вал. Коронавирус инфекци вӧлмонэн сэрен, ужрадэз гудырикошконлы выжтэмын но «Выль» праздникез сямен радъяны чакламын вал.

“Вылез котькуд семьяын сямен пусъё. Та нуналэ выль бакча сиёнъёслэсь шыд, выль кеньырлэсь ӝук пӧзьто. Жаляса верано луэ, бадӟым калык шулдыръяськон туэ уз луы. Радъясьёс Роспотребнадзорлэсь ужрадъёсты ортчытонлы пуктэм вань куронъёссэ быдэстыны уз быгатэ. Озьыен, ми калыкез кышкытэсь утёнлы гарантия сётыны ум быгатӥське. Адямилэн улонэз но тазалыкез валтӥсь дунлык луо. Интыосын шулдыръяськонъёс ортчытӥськыны быгато. Выль калык сямысь но улонысь уг кошкы. Таӵе пумъянкыл кутэмын «Удмурт Кенеш» огазеяськонэн но Вавож ёрослэн адмнистрациеныз ӵошен”, – ивортэ Удмурт Элькунысь йӧскалык политикая министр Л.Н. Буранова.

Пусъёно на, 2021-тӥ арын Гербер шулдыръяськон Вавож ёросын ик ортчоз.

Озьы ик Удмуртилэн кунлык басьтэмезлы 100 ар пусъён усын куарусён толэзьлэн пумаз Россиын улӥсь калыкъёслэсь конгрессэс ортчытыны чакламын. Эпидемиологи югдур умой луиз ке, отчы Россилэн улосъёсысьтыз но куноос пыриськозы. Ужрадэз онлайн амалэн но радъяны но луоно, соку эшшо тросгес пыриськисьёс но экспертъёс итӥськыны быгатозы.