Россиысь калыкъёслэн огъя луэмзылэн араз калык кусыпъёслэсь юнматонзэ но лулчеберет узырлыклэсь утёнзэ пусйыса туэ шулдыръяськонлэн пуштросэз эшшо но муромиз.

Шулдыръяськон яркыт концертысен кутскиз но азинскиз шествиен. Карын улӥсьёс яратоно ӟуч гожъяськисьёссылэн но кылбурчиоссылэн книгаосынызы Операя но балетъя театрысен Калыкъёслэн эшъяськон синпелетсы дорозь мынӥзы.

Карлэн валтӥсь площадкаяз «Танок», «Андан», «Розовый слон» ансамбльёс шулдыртӥзы. Сӥё-дано данъетазы ӟуч кыллы но литературалы сӥзем «Азбука дружбы», «Мой родной русский» но «Без срока давности» вожвылъяськонъёслэсь вормисьёссэ.

Калыкъёслэн эшъяськон синпелетсы дорын радъямын вал тунсыко площадкаос:

— «Сергей Есенинлэн квартирникез» — кылбур лыдӟонъёс, шара микрофон, зэмос крезьгур;

— «Калыкелэн кылыз» трос калыкъем площадка — йӧскалык шудонъёс но анай кылъёсын выль кылъёсты тодон;

— «Ӟученыз эшъяськиськом» шудон площадка — викторинаос, визькылъёс но туала кылъёс ӝӧквыл шудонъёс амалэн;

—«Кириллициалэн кылсуредъёсыз» мастер-классъёс;

— Синпельёсты кылдытонъя егитъёслэн площадказы.

Вань сюлмысь Удмуртиысь улӥсьёсты ӟечкыласькомы та югыт праздникен! Мед ӟуч кыл, славян гожъяськет но элькумынлэн лулчеберет узырлыкез котьку огазеялоз, шунтоз, визьнодалоз милемыз!