Таяз аре удмурт йӧскалык шулдыръяськон  17-тӥ инвожое Вотка ёросысь Пихтовка черкогуртысь Сива шур котырын ортчоз. Ужрадэз радъяло: Удмуртиысь йӧскалык политикая министерство, Эшъяськонъя юрт но Вотка ёрослэн администрациез.

Герберын туэ ваньмыз герӟаськемын луоз чорыген (рус. «рыба»). «Пихтовка» огазеяськон угось быдэс шаермылы но, солэн палэназ но тодмо луэ чорыг будэтэменыз. Чорыг юнме быръемын ӧй вал – соин герӟаськемын удмуртъёслэн тросэз воршуд нимъёссы. Вашкалаослэн оскемзыя, Музъем, пе, возиське ошлэн сюръёсыз вылын, нош со бадӟым чорыг вылын сылэ.

Герберын пӧртэм азбаръёс ужалозы: «Куно пумитан», «Вӧсян», «Жингрес возьвыл». Лымшор но уйпал удмуртъёс куспын ортчоз «БОНЫ vs. БЕНЫ» футболъя ӵошатскон. Программаын вылез луоз «Чорыг кутылон» ужрад – мыло-кыдоос кужымзэс мерталозы лескаен чорыг кутылыса, дротик лэзьяса но вал вылын ворттылыса.

Воткаын вордӥськиз быдэс дуннелы тодмо композитор Пётр Ильич Чайковский. Нош элькунысь егит усточиос Воткаысь крезьгуръя но педагогикая колледже дышетскыны пырыны тыршо. Ӵапак татын вуоно крезьгурчиосты крезен шудыны дышето. Талы луыса, Герберлэн одӥгаз азбараз радъяськоз егитъёслы сӥзем «Куара-ланга» фестиваль, кытын крезь но мукет инструментъёс чузъяськозы.

Вашкала сям-йылолъёс но улӟытэмын луозы. Азьло Гербер шулдыръяськонын бусы сюан ортчытъяло вал. Ог-огзэс гажась егит нылашез но пияшез вуоно «карт» но «кышно» карыса дӥсяло. Озьы семья кылдытыны дась луэмзэс возьмато. Туэ но ёросысь егитъёслэн луонлыксы луоз «Бусы сюан» (Свадьба поля) шудонэ-вожвылъяськонэ пыриськыны.

Герберын кылдытэмын луоз аспӧртэмлыко синпелет: ёросъёсысь Кибашлыослэн юртъёсазы тыршисьёс лэсьтозы-вурозы ёроссылэн гербзылы сӥзем лякиё шобретъёс. Герберын соос ог-огзы борды вуремын луозы, озьы кылдоз быдэс шаермылэн лякиё шобретэз.

Ужрадэ пыриськыны ӧтисько элькунысь, бускель  ёросъёсысь делегациос, удмурт мерлыко огазеяськонъёсысь, ивор вӧлмытон ёзэсъёсысь огмуртъёс, улосчиос но лыктэм куноос.

Шулдыръяськонлэн сӥё-дано усьтонэз 11:00 часын кутскоз.

Герӟаськон: (3412) 63-10-24 – Чернова Алина Владимировна, Калыкъёслэн эшъяськон юртысь егитъёслэн кичӧлтонъёссыя но мерлыко ӵектосъёсъя ёзэтэн кивалтӥсь, ужрадлэн координаторез;

8(34145)518-81 – Елькина Надежда Владимировна, Вотка ёрос Администрациысь лулчеберетъя, спортъя но егитъёсын ужан политикая ёзэтлэн кивалтӥсез