Куарусён толэзе Удмурт Элькунысь йöскалык политикая министерство Дэбес ёрос Администрациен ӵошен йöскалык сиён-юонъёслы сӥзем V улосвылкуспо «ЗАРНИ-Ё перепеч, табань но пельнянь» вожвылъяськон радъяло. Туэ со онлайн амалэн но «Пельняньлэн дунневыл нуналэз» фестивальлы дасяськон улсын ортче.

Вожвылъяськонэ пыриськыны быгато калык творчествоя коллективъёс, мерлыко огазеяськонъёс но вань мылкыд карисьёс. Фестиваль 30-тӥ куарусёнозь ВКонтакте https://vk.com/zzzarniperepech огинын радъяськоз. Ужрадъясьёс дэмлало 2 тунсыко площадкаос: туспуктэмъёсъя «Дэбес дэлет» но йӧскалык лулчеберетъя «Чупчигуръёс».

Туспуктэмъёсъя вожвылъяськонэ пыриськон понна ВКонтакте огинын перепеч пöранлэсь котькуд вамышсэ туспуктыса келяно. Одно ик гожтоно интыез, пöраськеме понэм сиёнъёсты, сиёнэз пöраны быдтэм дырез. Вормисьёсты 3 номинациын пусъёзы: «Сиёнэз пöраны тужгес но аспöртэмлыко валэктон», «Йöскалык сиёнэн тужгес но тунсыко тодматон», «Йöскалык сиёнэз ӝöк вылэ тужгес но ӟечез  пуктон амал».

«Чупчигуръёс» площадкае пыриськон понна, калык сям-йылолъёсты возьматыса видеоролик лэсьтоно. Сям-йылолъёс интыысь аспöртэмлыкъёсты возьматыны кулэ. Вормисьёсты 3 номинация быръёзы:  «Сям-йылол», «Кадриль», «Кылбугор».

Вожвылъяськонлэн валтӥсь меретэз: калык сямъёсты, лулчеберетэз  утён но азинтон, егитъёс пöлы вöлмытон.