14-тӥ куартолэзе Калыкъёслэн Эшъяськон юртазы нылпиослы «Как много между нами общего» нимо элькун фестиваль ортчоз. Татчы пыриськозы пöртэм йöслыко 6-10 аресъем нылпиос. Ужрадлэн валтӥсь меретэз – пиналъёсты пöртэм калыкъёслэн сям-йылолъёсынызы тодматон но соослэсь огвыллем, ог-огзылы матын луэмзэс возьматон-пусъён. «Нылпиослы ми кылдытом шуныт, эшлыко атмосфера. Тодосчиослэн эскеронъёссыя, 10 аресозь пиналъёс котькыӵе тодэтэз туж ӝог йыразы кельто, но соос уггес быгато на информацилы дунъет сётыны. Соин ик пиналъёслы котькуд адямилы дуно но кулэ луись валанъёсты дырыз дыръя валэктыны, пыӵатыны кулэ. Калыкъёслэн выжыкылъёсысьтызы, сям-йылолъёсысьтызы трос огкадьзэ шедьтыны луэ. Куд-ог кылъёсты но пöртэм выжы калыкъёс огвыллемгес верало», – ивортэ Калыкъёслэн Эшъяськон юртысьтызы öнерчи Альбина Иващенко.

Фестивальын пиналъёс арня нуналэ ужась школосынызы тодматозы, кырӟалозы-эктозы. Со сяна, ужрадъясьёс нылпиослы квест малпазы на. Йылпумъяськоз ужрад шулдыр эктонъёсын.

Фестивале дасяськон кутскемын ини. Южтолэзьысен ужрадъясьёс куинь марафон ортчытӥзы, кудъёсаз нылпиослы таӵе ужъёс лэсьтыны ӵектэмын вал: анайёссэс 8-тӥ южтолэзь праздникен анай кылын ӟечкылано, калык эктон эктоно, калык дӥсь сярысь верано.

 #МногоОбщего хештегъя арнянуналэ ужась школаосы ветлӥсь но фольклор коллективъёсысь пиналъёслэсь, каръёсысь но ёросъёсысь усто нылпиослэсь ужъёссэс учкыны луоз. Тужгес устоосыз финалэ öтемын.

Ужрад ортче лулчеберет кичöлтонъёсъя Президент грант улсын.