3-тӥ инвожое Алнаш ёросысь Пор Гондыргуртын Семык гужем шулдыръяськонэз пусйизы. Туэ гужем со 27-тӥ ползэ радъяськиз. Ужрад пор мифологилы, калыклэн дунне шоры учкемезлы сӥземын вал.

Празднике Удмуртиысь, Марий Эл но Татарстан элькунъёсысь куноос лыктӥзы. Соослы ӟечкылан кылъёсын вазиськизы РФ-ысь Кун Думаысь депутат Лариса Буранова, УЭ-ысь Кун Кенешлэн кивалтӥсезлэн воштӥсез Татьяна Ишматова, УЭ-ысь йӧскалык политикая министр Эдуард Петров но Алнаш ёрослэн кивалтӥсез Алексей Семенов.

«Шумпотӥськомы, туннэ алнаш музъем тужгес но чебер Семык празднике сомында калык бичаны быгатӥз шуыса. Поръёс понна та шулдыръяськон дуно но мусо луэ. Соос дауръёс ӵоже чебер кылзэс, сюлмысь крезьгурзэс, сям-йылолъёссэс утьыны быгатӥзы. Азьланяз но тазьы ик медло», – вераз Эдуард Петров.

Куноосты пор шӧмъем дышетон-шулдыръяськон программа, куиськонъя мастер-классъёс, киужъёсын, синпельёсын адӟытон-вузкаронъёс, сям-йылол сэбедэн нуназеяськон возьмазы. Мылкыд карисьёс музейлэн экспозициосыныз тодмасткизы.

Элькунысь Тӧролэн Александр Бречаловлэн кичӧлтэмезъя, таиз ар егитъёслэн арзы шуыса пусйиське. Талы луыса, егит семьяослы «Семья-хранитель традиций» вожвылъяськон ортчытӥзы.

Шулдыръяськонлэн пумаз Алексей Семенов семыклэсь пуссэ Грах ёрослэн кивалтӥсезлы Виктор Беловлы сётӥз. Вуоно арын пор праздник ӵапак отын радъяськоз.