Россиысь калыкъёслэн огъя луэмзылэн араз, 17–18-тӥ пӧсьтолэзе Сибирьлэн шоркарез — Омск —  кунысьтымы калыкъёсты бордаз люказ. Отын федерал Сабантуй ортчиз. Удмуртилэсь делегацизэ элькунысь йӧскалык политикая министр Эдуард Петров валтӥз.

УЭ-лэн пыриськемез йӧскалыккуспо тупаса улонэз юнматонын бадӟым вамыш луиз. Омск музъем вылын таӵе бадӟым праздникез радъян Удмуртия понна выль опыт луиз азьланяз бадӟым ужрадъёсты ортчытонлы.

Ужрадлэн валтӥсь люкетъёсаз пӧлын: ипподромын ӵошатсконъёсты сӥё-дано усьтон, жоккейёслэн парадзы но мылкыдэз бугыртӥсь ворттылонъёс. Ӝытазе делегациез Татарстанысь но Омск улосысь искусство удысысь усточиослэн концерт программазы огазеяз. 18-тӥ пӧсьтолэзе Совето Союзлэн Героезлы Муса Джалильлы бюст-памятник усьтон ортчиз. Нуналлэн бадӟым ужрадэз луиз пыриськисьёслэн валтӥсь площаьын мынэмзы но мерлык удысын тыршисьёсты данъетан. Делегатъёс бигеръёслэн улон-вылонэнызы тодматскизы, йӧскалык сиёнъёсты веръязы, кибашлыослэн ярмарказы но мастер-классъёсазы пыриськизы.

«Сабантуй — со огшоры йӧскалык шулдыръяськон ӧвӧл, со асьме быдэс кунысь вань калыкъёс куспын люконтэм эшъяськонлэн тодметэз. Омскын шулдыръяськонлэсь мынэмзэ адӟем карыса, асьмеос туннэ нуналысен ик 2028-тӥ арын Ижкаре быдэс Россиысь куноосты вылӥ дунлыкен пумитаны дасяськиськом ини», — пусйиз Удмурт Элькунысь йӧскалык политикая министр Эдуард Петров.