25-тӥ толшоре УЭ-лэн Тӧроез Александр Бречалов но Россотрудничестволэн кивалтӥсез Евгений Примаков Калыкъёслэн Эшъяськон юртазы вуылӥзы. Директорез Юлия Шахтина юртлэн ужез сярысь вераз но экскурсия ортчытӥз. Собере этноковоркинг площадкаын Удмуртиысь йӧскалык-лулчеберетъя огазеяськонъёсын мыло-кыдо пумиськон ортчиз.

«Тӥ тодӥськоды, кунмылэн Президентэз 2024-тӥ арез Семьялэн Ареныз юнматӥз. Удмуртия умоен лыдъяз та пумкылъянэз. Асьме элькунамы тупаса но ог-огзэсты гажаса уло ӟучъёс, удмуртъёс, бигеръёс, поръёс, чувашъёс – 130-лэсь тросгес калыкъёс. Со эшъяськон но ог-огдэ валан вылын кылдытэмын одӥг бадӟым трос йӧскалыкъем семья. Макем ӵемгес ми тӥледын пумиськиськом, куноосмылы ӵектосъёсмы сярысь вераськом, сокем тросгес элькунмы сярысь палэнын тодо. Зэмзэ ик, Удмуртиез тодыны кулэ, солэсь историзэ, лулчеберетсэ, мед котькинлэн асьме шаерамы улэмез но ужамез потоз», – пусйиз Александр Бречалов.

«АРТЭ» центрлэн ёзчиез Алина Чернова этнокультура удысысь дышетонъя медиалаборатория сярысь вераз, кудӥз удмурт кылэз дышетон понна пӧртэм цифровой амалэн арбериос кылдытэ. Азьмугез – нылпиос но егитъёс пӧлын удмурт кылъя дышетонэз вӧлмытыны, тунсыкез бадӟыматыны. Ивортодэт ресурсъёсысь луэ шедьтыны лэсьтэм 10 мультсериалъёсты – дышетскись мурт вӧзы Арки герой кылдэ, со удмурт кыл дуннеен тодматскыны юрттэ. Котькуд сериезлэн ньыль пӧртэм амалъя лэсьтэм продуктъёсыз вань: адӟытонъёс, аудиоподкастъёс, анимациос но онлайн амалэн шудонъёс.

Удмуртиысь Ӟуч лулчеберетъя огазеяськонлэн азьветлӥсез Евгений Костенко «ЭтноПроект Ура!» ӵектоссэ адӟытӥз. Пукон ӝыт (вечорка) амалъя ужрад семьяосты огазея. Нылпиос но бадӟымъёс калык шудонъёсы, кырӟанъёсы но эктонъёсы пырисько.

Армянъёслэн «Арарат» йӧскалык-лулчеберетъя огазеяськонзылэн председателез Арсен Мосоян калыкъёс куспын спартакиада сярысь мадиз. Ар ӵоже футзалъя, шахматэн шудонъя, ӝӧквыл теннисъя но волейболъя ӵошатсконъёс ортчыло. Мугор лулчеберетэз но спортэз вӧлмытон йӧскалык-лулчеберетъя огазеяськонъёслэн ёзчиоссы пӧлын быдэсак тупало «Демография» йӧскалык ӵектослэн азьмугъёсызлы, кудзэ Россия Федерацилэн Президентэз Владимир Путин кичӧлтӥз. Матысез турнир – шахматэн шудон 27-тӥ толшоре.

Асьсэ ӵектосъёсынызы тодматӥзы на:

– «Вместе» Ассоциацилэн огмуртэз Роман Серов – 2024-тӥ арлы сӥзем этноволонтёръёслы событийной дырпус;

– Егитъёслэн «Шунды» огазеяськонысьтызы ёзчиос Григорий Григорьев но Богдан Анфиногенов – Даур ТВ + ФМ;

– Прикамье улосын улӥсь калыкъёслэн Ресурсъя центрысьтыз Мария Уткина – «Родина – значит вместе» шудонъя конструктор;

– «Достлуг» Азербайджан мерлык центрысь егитъёслэн кенешысьтызы Руслан Эминов – КВН-ъя турнир;

– «Куара» центрлэн председателез Владислав Степанов – Удмурт клипмейкингъя «ПУС» лаборатория.

«Котьку шумпотӥсько йӧскалык-лулчеберет огазеяськонъёсын пумиськыны, малы ке шуоно со котьку но пӧртэм калыкъёслэсь ужпумъёссэс, юн герӟаськемзэс эскеронлы пӧрме. Кунгож сьӧры мон трос пол вуылӥ, нош Россиын, тужгес но Удмуртиын – Пётр Ильич Чайковскийлэн вордскем шаераз – пӧртэм калыкъёслэн куараоссы симфониын сямен чузъясько, отын огъя оркестр понна котькудӥз инструмент ас интыяз луэ», – вераз Евгений Примаков.