Удмуртиын егитъёслэсь кун йӧскалык политика удысын кичӧлтонъёссэс улонэ пыӵатонлы сӥзем грант вожвылъяськонлы йылпумъянъёс лэсьтэмын. Радъясьёс доры 30 куриськон вуиз, соос пӧлысь 13-ез оглом 3 миллион манет тыр коньдон басьтӥзы. Коньдон Удмурт Элькунысь Йӧскалык политикая министерство висъяз.

Ӵектосъёсты улонэ вӧлмытон 2026-тӥ ар пумозь чакламын — Россиысь калыкъёслэн огъя луэмзылэн аре. Вормисьёс пӧлысь котькудӥз Удмуртиысь кун кылъёсын но элькунысь мукет калыкъёслэн кылъёсынызы печатной яке аудиовизуальной продукт кылдытоз: бичетъёс, подкастъёс, видеоматериалъёс, ӝӧквыл но цифровой шудонъёс, фильмъёсты но мультфильмъёсты берыктонъёс, квестъёс, литература изданиос. Егитъёсты лулчеберет но кыл узырлыкез утьыны кыскон ужрад «Семья» йӧскалык ӵектослэн, кудӥз Россия Федерацилэн Президентэз Владимир Путинлэн пуктэмезъя улонэ пыӵа, ужпумъёсызлы тупа.

«Вань аръёсты лыдэ басьтӥськом ке, вераны быгатӥськом, туж трос куриськонъёс вуилӥзы ни шуыса. Со возьматэ егитъёслэсь вордскем кылъёсты утьыны но азинтыны будӥсь тунсыкъяськемзэс, туала но кулэ луись амалъёсты ӵектыны дась луэмзэс. Та выллем кутсконъёслы юрттэт сётон — Удмуртилэн но быдэс Россилэн кыл узырлык понна бадӟым ватсэт», — пусйиз Удмурт Элькунысь йӧскалык политикая министрлэсь ужзэ быдэсъясь Эдуард Петров.

Вожвылъяськонлэн йылпумъянъёсыныз но ӧрилэн протоколэныз тодматскыны луоз Министерстволэн вотэсбамаз  «Конкурсное распределение грантов среди физических лиц на реализацию молодежных проектов в сфере государственной национальной политики в 2026 году» люкетын.