3–8-тӥ шуркынмонэ Удмуртиын тямысэтӥ ползэ «Бадӟым этнографической диктант» гожтӥзы. Калыккуспо югдытон акция тодматэ асьмеды Россиысь пӧртэм калыкъёслэн лулчеберетэнызы, озьы ик этнокультура сярысь тодон-валанмес дунъя.

Диктантэз площадкаосын но сайтлэн вотэсбамаз гожтыны луэ вал. Таяз аре быдэс Элькунысь 210 площадкаосын 6 730 адями диктант гожтӥз, соос пӧлысь 2 143 – пиосмуртъёс, 4 587 – кышномуртъёс. Шорлыдо балл – 54,8, шоро-куспо арлыд – 34 арес.

«Ӟеч йылол со – «Бадӟым этнографической диктант» ортчытон. Пусъёно, та акция Удмурт Элькунын кылдӥз, но али со Россия Федерацилэн вань улосвылъёсаз но мукет кунъёсы вӧлмытэмын. Арлы быдэ пыриськисьёслэн лыдзы ялан будэ, учкимы ке берпуметӥ аналитикаез, адӟомы: Удмуртиын азьло 160 площадка вал, нош али – 210 ини. Со вера, кутскем йылол азинске но котькинлы тунсыко луэ шуыса. Ачим мон диктантэз нырысетӥяз уг гожтӥськы, кык ар ини Россиысь калыкъёслэн форумазы пыриськисько. Шумпоттытэ, делегатъёс, кудъёсыз форуме пырисько, мыло-кыдо возьмато асьсэды та ужрадын. Удмуртиын арлы быдэ трос ӵектосъёс улонэ вӧлмо, соос пӧртэм калыкъёслэн лулчеберетсы, озьы ик этнокультура сярысь тодон-валанъёсмес дунъяло. Йӧскалык политикая министерство юрттэмен котькуд ар «ЭтноЭксперт» нылпиослы визьбуро шудон, «Родина – значит вместе!» споръяськон площадкаос ортчытъясько, таяз арын Удмуртиын ужаны кутскиз Россиысь этноволонтёръёслэн нырысетӥ корпуссы, йӧскалык праздникъёс сӥё-дано пусйисько. Со сяна, 42 йӧскалык-лулчеберет огазеяськонъёс пӧлысь котькудӥз асьсэ ӵектосъёссэ улонэ вӧлмытыны тырше», – вераз УЭ-ысь Йӧскалык политикая министр Петров Эдуард Степанович.

Онлайн амалэн тест ортчиз Бадӟым этнографической диктантлэн miretno.ru официальной вотэсбамаз. Таяз аре но пыриськисьёс юанъёслэсь шонер валэктонзэс соку ик тодыны быгато вал, исторической справкаос сётэмын ошмессинъёс вылэ ссылкаосын.

«Со ас тодон-валандэ эскерон, ачид шоры мукет синмын учкон. Ку юанъёсты адӟиськод, котьку пуш сюлмаськон кылдэ, экзамен сётыку кадь ик. Малпаськыны кулэ, йырвизьмез сынаны. Со тунсыко, малы ке шуоно макем тросгес адямиос тодо калыкъёслэн историзы сярысь, сокем ӧжытгес споръяськонъёс но валантэм югдуръёс кылдо», – ас малпанъёссэ Альбина Иващенко вераз.

Тодэ вайытомы, та проект 2016-тӥ арысен кутскиз, Удмуртилэсь ӵектоссэ азьланьтӥзы Россия Федерацилэн вань улосвылъёсыз, асьме кунысь 90 000 адями пыриськиз акцие. 2017-тӥ арын проект калыккуспо луиз. 2020-тӥ арын Россия Федерациысь вань улосвылъёсысьтыз но 123 кунъёсысь 1 742 661 адями диктантэз гожтӥз. Ӵектос «Ассамблея народов Удмуртии» мерлыко огазеяськон но УЭ-ысь Йӧскалык политикая министерство кичӧлтэм улсын кылдӥз. «Бадӟым этнографической диктант» югдытон акция саклык висъяны косэ этнокультура но этнографи удысъёсты, нюръяське соосты ляб тодонэн но соин валче калыкъёслэсь шонертэм стереотипсэс кылдытонэн.

Йӧскалык ужъёсъя Федерал агенство ӵектослы бадӟым юрттэт сётӥз, со ик акцилэн валтӥсь радъясез луэ.

Та уждадлы тодослыко юрттэт сётӥзы Россиысь Тодосъёсъя академилэн Этнологияя но антропологияя институтэз но Урал ёзэтысьтыз историяя, кылъя но литературая Удмурт институтэз.