«Нечкино» шутэтскон курортын Удмурт Элькунысь Калыкъёслэн Эшъяськон юртсы но егитъёслэн «Шунды» мерлыко огазеяськонзы «БУД» этнокультурной ӵектосъёсъя Акселератор ортчытӥзы УЭ-ысь йӧскалык-лулчеберетъя огазеяськонъёсысь 12 командаос понна.

Кызьы пусйизы ужрадэз радъясьёс, этнокультурной ӵектосъёслэн Акселераторзы йӧскалык кусыпъёсты азинтонлы но егитъёслэсь патриотизм мылкыдзэс юнматонлы сӥземын.

Йӧскалык-лулчеберетъя огазеяськонъёсысь егит азьветлӥсьёслэн нырысетӥ пумиськонзы ортчиз таяз аре тулыс «БУД» Акселератор ужрад улсын. Ужпумлэн йылпумъянэз – егитъёслы этнодырпус (этнокалендарь) кылдытон, кудӥз УЭ-ысь трос йӧскалыкъем егитъёслы валтӥсь юрттэт луиз – асьсэ но йӧскалыккуспо ӵектосъёссэс улонэ пыӵатон удысын.

«Калыкъёслэн Эшъяськон юртсы но Йӧскалык политикая министерство УЭ-ысь 40-лэсь трос йӧскалык-лулчеберето огазеяськонъёсын валче ужало. Соос пӧлын бадӟым инты басьто егитъёслэн мерлык огазеяськонъёссы, кудъёсыз озьы ик тыршо утьыны, вӧлмытыны асьсэ калык лулчеберетсэс, – пусйиз Акселераторлэн кивалтӥсез но Калыкъёслэн Эшъяськон юртсылэн директорезлэн воштӥсез Алина Чернова. – Жаляса верано, туала дыре егитъёс мылпотытэк мерлык ужрадъёсы пырисько. Милям Акселератормы трос йӧскалыкъем егитъёсты огазеян понна кылдытытэмын, калыкъёс куспын герӟетъёсты юнматон понна проектъёс лэсьтонлы но соосты улонэ пыӵатонлы сӥземын.

Акселераторлэн таиз программаез йӧскалык-лулчеберето огазеяськонъёсысь егит азьмынӥсьёс понна мерлык проектирование дышетонлы сӥземын вал. Кык нуналскын Акселераторе пыриськисьёс асьсэ этнокультураен герӟаськем ӵектосъёссэс кылдытъязы. Нош юрттӥз соослы та ужрадын УЭ-ысь Мерлык палаталэн ёзчиез, мерлык проект лэсьтӥсь, «Сенеж» кивалтонъя мастерскойын дышетскем Ирина Шихарева.

«Проектировать карон ужез муромытыса вераны тыршимы, ужрадлэсь бадӟым пайдалыксэ возьматӥмы, – пусйиз Ирина Шихарева. – Пиналъёс – ӟечокъёс, ваньзы ас ӵектосъёсынызы доразы берто. Малпасько, ми заявкаез пумозяз гожтыса ӧм вуттэ, дыр, шуыса. Но мон оскисько, Акселераторе пыриськисьёслэн вань мылкыдзы заявказэс йылаз-пумаз вуттыны но келяны сыӵе фондъёсы, кудъёсыз грантъёсты люкылыло. Яке партнёръёс доры юрттэтэн вазиськыны быгатозы».

Нимысьтыз саклык висъямын йӧскалык кусыпъёсты тупатон удысын наставничество амалэз уже кутонлы. БУД-лэн котькуд командаез наставникеныз ӵош дышетсконэз пыр-поч ортчиз.

«Ӵектосъёсын ужаме мынам ини вань, но мынам потэ вал валаме, кызьы шонер соосты гожтыны но вожвылъяськонэ келяны, – ас мылкыдзэ Кез ёросысь егитъёслэн «Шунды» мерлыко огазеяськонзылэн командаысьтызы Лия Григорьева вераз. – Акселераторын ми ужамы ӵектос бордын, кудӥз туала удмурт дӥсь вуронэн герӟаськемын. Малы ке шуоно милям потэ, мед нылпиос ас ӵыжы-выжыоссылэн лулчеберетынызы тунсыкъяськозы но сое асьме улонэ вӧлмытозы шуыса».

Азьланяз – наставникъёсын ӵош ӵектос заявкаосты йылаз-пумаз вуттон. Та ужрадлэн йылпумъянэз – бадӟым форумын дась проектъёсты адӟытон но потенциальной партнёръёслэсь юрттэт басьтыны тыршон. Матысь дыре озьы ик азинтӥськозы мукет дышетскон ужрадъёс, кылсярысь, НКО лекторииосын кун йӧскалык политикаысь экспертъёсын пумиськонъёс.

Проект Президент ӵектосъёсъя фондлэн но Россиысь калыкъёслэн Ассамблеяысь улосвыл ёзэтлэн юрттэмез улсын ортче.