28-тӥ толсуре улонысь малпамтэ шорысь кошкиз кылосбур тодосъя доктор, Удмурт кун университетысь огъя но финн-угор кылтодонъя кафедраысь профессор, УАССР-ысь но Россиысь тодосъя дано ужась, Удмуртиысь гожъясьёслэн огазеяськонзылэн ёзчиез, Финн-угор огазеяськонлэн дано ёзчиез Валей Кельмакович Кельмаков (14.01.1942 – 28.12.2023). УЭ-ысь Йӧскалык политикая министерство Валей Кельмаковичлэн ӵыжы-выжыосызлы но матысь адямиосызлы куректэмзэ вера

Валей Кельмакович Кельмаков вордӥськиз 1942-тӥ арын 14-тӥ толшоре Татарстанысь Кукмор ёросысь Тыло гуртын крестьян семьяын. Улынгуртысь школаез йылпумъяса, 1959-тӥ арын Удмурт пединститутысь историяя но кылосбуръя факультетлэн удмурт ёзэтаз дышетскыны пыриз. Бӧрысь СССР-ысь тодосъя академилэн Кылтодонъя институтэзлэн аспирантураяз дышетскиз. 1968-тӥ арын Удмурт научно-исследовательской институтын ужаны кутскиз.

1971-тӥ арын Валей Кельмакович Удмурт кун университетэ ужаны выжиз, татын берпуметӥ нуналозяз мыло-кыдо тыршиз.

Валей Кельмаков – 500-лэсь трос тодослыко ужъёслэн авторзы. Удмурт морфологияя, синтаксисъя, кылпӧрмытонъя, лексикологияя, лексикографияя, этимологияя, ономастикая трос ужъёс гожтӥз. Солэн эскеронъёсыз удмурт но финн-угор кылтодонэз азинтонын бадӟым пытьы кельтӥзы. Валей Кельмакович языковедъёслэсь-пермистъёслэсь школазэс кылдытӥз, отын удмурт но коми-перм диалектологиез, грамматикаез но ономастикаез эскеро. Финно-угроведение удысын вылӥ квалификациен ӧнерчилэн данэз Россиын гинэ ӧвӧл, кунгож сьӧрын но туж бадӟым вал. Солэн дышетскисьёсыз туннэ ужало Ижкарысь, Глазкарысь, Пермьысь наукаосъя но дышетонъя центръёсын, озьы ик кунгож сьӧрын.

Тодосчиен люкиськон 30-тӥ толсуре Ижкарысь Квартальной проездысь 25 номеро юртын, «Ангел» компаниын, ортчоз.