Россилэн азьмуртэз Владимир Путин «Знание» огазеяськонлэн марафоназ пыриськисьёсыныз пумиськиз. Соос лулчеберетэз, кылэз, ӧнеръёсты утён ужпумъёс, грант юрттэт сярысь кенешизы. Пумиськон Москваысь «Манеж» шор адӟытон залын ортчиз. Марафонэз «Знание» огазеяськон ортчытэ «Егитъёс но пиналъёс» йӧскалык ӵектос улсын.

«Асьмеос нырысьсэ Россиысь ӧжыт лыдъем выжы калыкъёслэсь нуналзэ пусйиськом. Вань сюлмысьтым ӟечкылам потэ тӥледыз но быдэс Россиысь кунмуртъёсты та нуналэн. Марлы ваньзэсты? Малы ке шуоно трос лыдъем но, ӧжыт лыдъем но калык – асьмеос Россиысь калыкъёслэн одӥг бадӟым семьяез луиськомы, огъя семья – та бордын асьмелэн кужыммы. Ӧжыт лыдъем выжы калык но, бадӟым калык но – ми ваньзы шӧдыны кулэ, та асьмелэн огъя дормы шуыса. Та учыре гинэ асьмеос азьлань вамыштыны быгатом», – вераз Владимир Путин.

Россилэн азьмуртэз Владимир Путин «Знание» огазеяськонлэн «Знание. Первые» марафоназ кунысь ӧжыт лыдъем выжы калыкъёсысь огмуртъёсын, марафонэ пыриськисьёсын, пумиськиз. Соос лулчеберетэз, кылэз, ӧнеръёсты утён ужпумъёс сярысь вераськизы.

Удмуртиысь Балезино ёросысь Юнда черкогуртысь бесерман, трос нылпиё анай, Надежда Сидорова но вал. Ужрадэ со дас ньыль аресъем Злата нылыныз вуиз. Со «Азвесь крезь» калыккылос ансамблен но «Чингыли» нылпи клубен кивалтэ, калык гуръёсты, эктонъёсты, фольклорез улӟытонэн выре.

Надежда Сидоровалэн кузпалэз Алексей нимысьтыз ожгар ужрадын быриз.

Злата – Юндаысь 8-тӥ классын дышетскись, нылпи фольклор клубе пыриськись. Нылаш бесерман сям-йылолъёсты, кылэз дышетэ, вашкала крезьёсты кырӟа, Удмуртиын но палэнысь улосъёсын ортчись пӧртэм ужрадъёсы пыриськылэ.

Надежда нылыныз ӵош Владимир Путинлы но пумиськонэ люкаськемъёслы бесерман крезез быдэстӥзы. Юнда черкогуртын 12 сыӵе крезьёс утиськемын. Владимир Путин пусйиз таӵе лулчеберет люкетъёс трос калыкъёслэн выжыысь выжые азинско, утисько шонер верангуреныз, паузаосыныз.

Надежда соглаш луиз та веранэн но ватсаз, песянайёс бадӟым саклык висъяло крезьёсты шонер мед кырӟалозы шуыса, кулэ интыосаз тупатыны но быгатозы, пе.

«Знание. Первые» марафон 28-30-тӥ оштолэзе ортчиз но Россиысь калыкъёслэн огъя луэмзылэн арезлы сӥземын вал. Ужрад кунысь вань федерал округъёсысь 10 каръёсты огазеяз. Валтӥсь площадка Москваысь «Манеж» шор адӟытон залын вал.

Лекторъёслэн кенешемзы «Знание» огазеяськонлэн вотэсбамаз пуктэмын но югдытон огазеяськонлэн ВКонтакте нимлыко огиназ.

Туспуктэм: Алексей Никольский, РИА «Новости».