18-тӥ инвожое Воткинскын бигер но башкир калыкъёслэн тулы музъем ужъёслэн быремзылы сӥзем праздниксы – Сабантуйзы ортчиз.

Люкаськем калыкъёсты ӟечкыланы Удмурт Элькунлэн Тӧроез вуылӥз. Александр Васильевич калыкез тулыс музъем ужъёслэн быременызы ӟечкылаз, ужзы понна тау кариз но азинсконъёс сӥзиз. Бӧрысь элькунмылэсь Тӧрозэ бигеръёслэн Сарапулысь мерлыко огазеяськонзылэн азбараз куно каризы. Та огазеяськон туэ 25 ар тырмонзэ пусъе. Озьы ик ужрадэ пыриськизы: Удмурт Элькун Кивалтэтлэн Тӧроез В. Савельев, Удмурт Кун Кенешлэн Тӧроез В.Невоструев, Удмурт Элькунысь йӧскалык политикая министр Л.Буранова, Татарстан улосысь ужъя но калыкез мерлыко утёнъя министрлэн воштӥсез Марат Гафаров, Удмурт Элькунысь бигеръёслэн мерлыко центрзылэн кивалтӥсез Ильсур Миннемуллин, Удмурт Элькунысь бигеръёслэн йӧскалык но лулчеберт автономизэн кивалтӥсез Рамзия Габбасова.

Калык шулдыръяськон йӧскалык лулчеберетэз, сям-йылолъёсты гажамез но утемез возьматэ. Пӧртэм пумо вожвылъяськонъёс, батыръёслэн нюръяськонзы, секыт ӝутканъя ӵошатскон, кор вылэ пуксьыса турынэн тырмытэм мешокен тышкаськон, тыр ведраосын карнанэн бызьылон, мешокен тэтчан, шулдыр кырӟан-эктонъёс, курайлэн но арганлэн куараоссы, шудон-серектонъёс – ваньзэ тае калык шулдыръяськонысь шедьтыны луиз.

Валтӥсь сцена вылын калыкез шулдыртӥзы элькунысьтымы но бускель улосъёсысь лыктэм коллективъёс: бигер эктонъёсъя но кырӟанъя «Асылъяр» ансамбль, Воткакарысь «Дуслык» калык ансамбль, Каракулино ёросысь «Ак каен» ансамбль, бигер кырӟанъя Воткакарысь «Тургай» калык ансамбль.

Калык шулдыръяськонэ огъя 4 000 пала адями пыриськиз.

Туспуктэмез – ИА «Удмуртия».