14-тӥ оштолэзе Юкаменск черкогуртын «Удмурт Кенеш» но «Удмурт нылкышно кенеш» огазеяськонъёс, Йӧскалык политикая министерство но Юкаменск ёрос администрация юрттэмен улоскуспо конференция радъязы. Ужрад сӥземын вал Ашальчи Окилэн – нырысетӥ удмурт нылкышно кылбурчилэн, эмчилэн, фронтовиклэн – вордскем дырысьтыз 125 ар тырмонлы.

Конференцие тодосчиос, журналистъёс, литература, мерлыко удысъёсысь ужасьёс, Ашальчи Оки нимо йӧскалык примен пусъем лауреатъёс, Татарстанысь удмуртъёслэн йӧскалык-лулчеберетъя огазеяськонысьтыз ёзчиос пыриськизы.

Удмуртиысь йӧскалык политикая министр Эдуард Петров ужрадлэсь кулэлыксэ пусйиз:

«Кемалась ӧвӧл, Удмурт шаерын но солэн сьӧраз улӥсьёс удмурт диктант гожтӥзы, кудӥз Ашальчи Окилы но Кузебай Гердлы сӥземын вал. Нош туннэ, Ашальчи Окиез тодэ-буре вайыса, конференцие асьме элькунысь но бускель улосвылъёсысь усточиос, тодосчиос, журналистъёс, литература, мерлыко удысъёсысь ужасьёс люкаськизы. Акилина Григорьевна Быдӟым Атыкай тыложлэн нырысетӥ нуналъёсаз ик фронтэ кошке но трос адямиосты утьыны-бурмытыны быгатэ. Озьы кылбурчи дано военной хирург луэ. Та конференцилы луыса, кудӥз ог 10 ар радъяське ни, егитъёсмы но Ашальчи Окилэсь сӥё-дано подвигъёссэ, кылбуръёссэ тодазы возёзы, элькунлэн историеныз но удмурт литератураен тодматскозы», – пусйиз йӧскалык политикая министр Эдуард Петров.

«Удмурт Кенеш» огазеяськонлэн президентэз Андрей Ураськин удмурт кылбурчиен данъяськемзэ но гажамзэ вераз:

«Ашальчи Оки – юн сюлэмо но патриотизмо кышномурт. Со трос кужымзэ калык понна сётӥз: адямиосты утён понна, ачиз мылкыд кариз оже мыныны, бератаз вордӥськем шаераз ёрос больницаын тыршиз. Озьы ик, Ашальчи Оки – усто кылбурчи, удмурт литератураысь нылкышноос пӧлын нырысетӥез. Солы луыса, удмурт кылбур аспӧртэм лирической мылкыдын пыӵаз, выль сямен чузъяськыны кутскиз».

Туэ ужрад сӥземын нырысетӥ удмурт нылкышно кылбурчилы но эмъясьлы 125 ар тырмонлы, «Удмурт нылкышно кенеш» огазеяськонлэн 30 ар тырмонэзлы, егӥтъёслы, дышетӥсьёслы но визьнодасьёслы сӥзем арлы.

Лыдӟиськонъёсын кылбурчи сярысь тунсыко докладъёс чузъяськизы. Кылсярысь, Елена Миннигараева вераз, малы туала вакытэ но удмурт нылкышноослэн сюлэмъёсазы Ашальчи Оки улэ. Любовь Фёдоровалэн, педагогика тодосъёсъя кандидатлэн, докладэз кылбурчилэн эмчи луон мылкыдэныз пыӵамын вал. Син эмъясь врач Апполинария Перевозчикова элькунысь трахомаез быдтон но Ашальчи Окилэн та удысын тыршемез сярысь ивортӥз. Любовь Байкова, Удмурт Элькунысь Шор кун архивысь кивалтӥсезлэн воштӥсез, кылзӥськисьёсты Ашальчи Окилэн улон но ужан сюресэз архив документъёс пыр ивортодэтэн тодматӥз. ГГПИ-ысь студентка Оксана Анчукова мадиз, кызьы егитъёс кылбурчилэн веросъёсыз шоры учко. Нош Владимир Векшин «Для меня она была просто тётей Линой» нимо темаен тодматӥз.

Конференциын сӥё-дано сётӥське Ашальчи Оки нимо йӧскалык премия. Та данъетэн пусйисько шаерысьтымы адӟем карымон нылкышноос, кинъёс трос кужымзэс, дырзэс сёто анай кылмес, удмурт лулчеберетмес, тодос, дышетон, эм удысъёсты азинтонлы.

Таяз аре премия сётӥзы Адия Заитовна Диевалы – удмурт нылкышно кылбурчилы, кылысь кылэ берыктӥсьлы, кырӟанъёс гожъясьлы, кырӟасьлы, Россиысь писательёслэн но журналистъёслэн Союззылэн ёзчиезлы, Удмурт Элькунысь лулчеберетъя сиё-дано ужасьлы, «Удмурт Кенеш» огазеяськонлэн Ижысь Ленин ёросысь ёзчиезлы. Ада Диева мыло-кыдо пыриське мерлыко уже, сюлмаське удмуртлык понна, трос тунсыко пумиськонъёс ортчытъя, пӧртэм ужрадъёс радъя. Солэн Ижкарын аслаз кунокуаез но вань, «Гостиная Ады Диевой» шуыса нимаське.

Озьы ик пусъемын Лидия Васильевна Крестьянинова – Нылпиосты эмъянъя 9-тӥ номеро поликлиникаысь эмчи, тодмо удмурт мерлыко ужась, Удмурт Элькунысь тазалыкез утён удысысь сӥё-дано ужась, «Удмурт Кенеш» огазеяськонлэн Ижкарысь Октябрь ёросысьтыз ёзчиез. Лидия Васильевна Крестьянинова удмурт движениез мытӥсьёс пӧлысь одӥгез луэ. Удмурт калыкез сайкатонын, удмуртлыкез ӝутон но солэсь асваланзэ будэтон удысын трос кужымзэ сётӥз, калык пӧлын валэктон уж нуиз. 90-тӥ аръёсы, удмуртъёсты утчаса, Москваозь но, Эстониозь но, Казахстанозь но вуылӥз. Нырысетӥ Бадӟым ӧтчамез ортчытонын но радъянын одӥгез кичӧлтӥсь луиз. Удмурт калыкез утёнын, нылпиослэсь тазалыксэс эскеронын, нылпи висёнъёсты эмъянын, дун-чылкыт сямъёсты пыӵатонын, эшъяськон кусыпъёсты юнматонын вань кужымзэ, тодон-валанзэ сётыса тыршиз но тырше Лидия Васильевна Крестьянинова.