«Золотые имена народов России» – федерал ӵектос, кудӥзлэн валтӥсь ужпумез луэ Росси шаерысь пӧртэм нациен адямиосты, кудъёсыз асьсэ ужазы но кунмы понна бадӟым пайда лэсьтӥзы, шараяны но юрттэт сётыны.

Лудорвай шор ёзо школалэн директорез, удмурт кылъя но литературая дышетӥсь Надежда Николаевна Мерзлякова элькун вожвылъяськонын вормисе потӥз.

Солэн верамезъя:

– Зэмзэ ке, ӧй но малпа вормисе пото шуыса. Вожвылъяськон сярысь гужем положение келязы вал, но со дырлы трос уж люкаськиз: дышетскон арлы дасяськон, мукет вожвылъяськонъёс… Озьы положение ки дорам ӧз вуы. Берло ёросысь нош ик жингырто, кызьы дасяськон мынэ шуыса юало. Шонерзэ ке, видеоролик но характеристика дась ни вал. Ваньзэ келяй но ас ужъёсме азьланьтӥ.

Надежда Николаевна ачиз но валаса ӧз вутты, кызьы вормиз. Ӝыт гинэ мер вотэсысь ивортодэт адӟиз. Финалэ со Ханты-Мансийск каре мыноз.

Мерзлякова Н.Н. котыр ласянь таланто дышетӥсь. Со капчиен пыриське пӧртэм конкурсъёсы, проектъёсы. Кылсярысь, та нуналъёсы Надежда Николаевна Пятигорск карын Удмурт Элькунлэсь «Лучший учитель родного языка» вожвылъяськонын данзэ уте.

Мед удалтоз, Надежда Николаевна!